馬季開鑼打到嚟！郭富城唱主題曲+1600萬三T等你「全城出馬」 馬王嘉應高昇傷癒出擊 霍啟剛殺入馬會做董事
新馬季終於打到嚟！2026/27年度香港賽馬季今日（9月6日）正式喺沙田馬場開鑼。今季仲多咗個「星級亮點」——「馬年大使」郭富城將喺開鑼日擔任表演嘉賓，首度現場獻唱香港賽馬會年度主題曲《衝衝衝》。沙田馬場上午10時30分開放入場，全城馬迷磨拳擦掌準備迎接新一季。本文為你整合“香港新馬季2026開鑼” 日所有重點！
新馬季開鑼｜郭富城唱主題曲 1600萬三T等你贏
2026/27年度新馬季今日正式開鑼，整個馬季將舉行88次賽事，明年7月14日於跑馬地馬場煞科。開鑼日焦點賽事係第三場三級賽「香港特區行政長官盃」，途程1200米，總獎金420萬港元。對馬迷而言，開鑼日另一大吸引力係三T多寶——今期三T多寶高達1,600萬，第三場四重彩及四連環亦設200萬多寶。郭富城除咗唱主題曲，仲會參與開幕儀式同醒獅表演，為新馬季揭開序幕。
馬王嘉應高昇傷癒復出｜衝擊21連勝創歷史
開鑼日最矚目嘅名字，非「嘉應高昇」莫屬。呢匹短途馬王過去兩屆特首盃都贏馬，今年力爭三連霸。佢目前已經豪取20連勝，今仗將向21連勝傳奇紀錄發起衝擊。
不過賽前一度傳出隱憂——馬會曾宣布「嘉應高昇」左後蹄出現瘀傷，令不少馬迷擔心。幸好馬王周四如常快操，走勢強勁。練馬師希斯全程監察整個操練過程，對馬匹狀態十分滿意，直言如果健康有問題絕對唔會派佢上陣。馬王已通過獸醫檢驗，將可如期上陣。
霍啟剛殺入馬會做董事｜賽馬旅遊成績標青
馬會9月2日舉行周年大會，47歲嘅體演文出界議員霍啟剛獲選為新任董事，任期一年。霍啟剛自2004年起成為馬會會員，2021年起擔任遴選會員。佢回應話會將自身喺體育、文化同國際人脈網絡嘅經驗融入馬會工作，積極協助拓展國際影響力，推動「賽馬旅遊」。
馬會2025/26年度業績相當亮眼：博彩及獎券投注總額達3,317億元，按年升3.6%，創歷史新高。其中賽馬投注額1,433億元；足球博彩投注額1,790億元；六合彩投注額94億元。馬會全年度共向社會貢獻393億元。賽馬旅遊方面，過去一個馬季有超過40萬名旅客入場，按年增加105%，係2023/24馬季嘅4倍。
從化馬場10月世界級賽事突延期｜百億投資恐難回本
馬圈另一個熱話，係廣州從化馬場原定10月舉行嘅世界級賽馬活動突然延期。馬會表示近日接獲有關部門嘅最新風險評估，經雙方商討後決定延期。明報李先知專欄分析，馬會對從化馬場嘅投資達百億元，若無法舉行投注賽馬活動，將無法回本。
馬會另一挑戰係24億元「額外足球博彩稅」。馬會行政總裁應家柏直言，稅後經營盈餘由2022/23年度嘅52億元顯著下降至14億元。馬會期望該稅項按原定計劃於2028年4月屆滿。
其他焦點｜桂福特六駒出戰 班德禮復出
南非練馬師桂福特將派遣六駒出戰開鑼日，當中以五歲馬「威利金箭」最有機會為佢喺新馬季打響頭炮。此駒今次降班作賽，由第二班回師第三班，續由田泰安執韁。不過「威利金箭」將遇上呂健威麾下嘅「手機表勁」，後者上季出道後首四仗便取得三捷。
騎師方面，養傷多時嘅班德禮將喺開鑼日復出。佢自6月中受傷提早抖暑後，新季首戰騎6駒，其中夥拍柏廐「星運少爵」被視為爭取復出首勝嘅籌碼。上季班德禮因落樓造成左前臂骨折，最終以34勝完成，距個人單季39場頭馬紀錄差5場。不過開鑼日亦有小插曲——馬會因「技術問題」，未能派發新一年度賽馬月曆，將改派換領券。
新馬季戰火重燃，沙田馬場今日勢必人頭湧湧。無論你想親身入場感受氣氛，定係透過轉播投注，記住留意馬王嘉應高昇嘅表現，以及1600萬三T多寶隨時降臨！
